Ntawv Caw Saj Laj Nyob zoo txog tsoom ntseeg ntawm txhua lub xeev ntuj nyob Fab Kis teb, Hnub no, peb caw nej cov ua thawj coj, tiam lis thiab xib hwb, tuaj sib tham sab laj rau hnub tim : 02 lub 5 hlis xyoo 2009 nyob hauv lub chav tsev Salle B ‐ Presbytère – 121, rue St‐Marceau 45100 Orléans Thov nej teb ua ntej tuaj rau peb paub tias nej yuav tuaj tsawg leej. Peb thiaj pom qab npaj tos txais nej sawv daws. Rooj sab laj ntawd yuav pib txij li thaum 9 teev mus txog 18 teev. Peb yuav tham txog : 1‐ Lub hauv paus « aumônerie » txoj hauj lwm 2‐ Peb Hmoob Kav Tos Lis tej kab ke pam tuag thaum muaj ib siab ob qig 3‐ Lwm yam yog muaj. Cov lus tham txog peb txoj kab ke pam tuag, peb xav kom nej sib sau sab laj ua ntej nyob nej lub xeev ntuj thiab npaj sau cov lus nej tau sib tham tseg rau ib daim ntawv nqa nrog nej tuaj : 1‐ Hais txog Hmoob kev cai pam tuag, raws poj yawm qhuab qhia thiab ib txwm ua kam : a. Thaum ib tug neeg siav tu : Hmoob qhuab ke taw kev rau nws mus cuag poj cuag yawm, txheej txheem Hmoob ua li cas ? b. Tsev xyom cuab txhij neeg hu kwv hu tij, tso xov hu kev neej kev tsav, txhij tub qa tub num, nrhiav cuab tsav, tshwj kab kam xwm, hu txiv qeej txiv nruas tuaj nta dab nta qhua. c. Hais txiv xaiv foom kom, ua qhua txws hnub tshwm tshav, tua tsiaj, kwv ntsov nyuj. 2‐ Peb cov ntseeg Kav Tos Liv lub ntees pam tuag sawv daws ua kam : a. Xib Hwb los tus coj pawg ntseeg qhuab ke thiab xa plig hmo 1. b. Tsev xyom cuab npaj ib yam li hmoob ua kam : txiv cuab tsav, tshwj kab kav xwm, tub qa tub num… Tsis muaj hu txiv qeej txiv nruas. c. Hais txiv xaiv foom kom, ua qhua txws, tua tsiaj tua txhuv ib yam qub.
Aumônerie Hmong de France – TP Cwj Vuam Chiv – P. Antoine 25, rue du Cdt Jean Duhail 94120 Fontenay sous Bois - Tél. 01.48.75.81.02 / 06.58.01.31.82
3‐ Pib muaj teeb meem tshwm tuaj rau peb txoj kab ke pam tuag : a. Ib txhia tsis yuav kab ke pam tuag raws li Hmoob kev cai lawm. b. Ib txhia, tsis pom zoo ua kom tag tus txheej txheem kab ke pam tuag. c. Ib txhia tseem xav kom ua kom txhij txhua ib yam qub kev cai, yuav qeej yuav nruas li qub. d. Peb yuav npaj kom tau ib lo lus haum tas tsoom ntseeg sawv daws. Peb yuav tau nhiav lo lus ntawd ua ke. 4‐ Lus tham lus nug ib tsoom ntseeg sawv daws, laus hluas, poj niam txiv neej. Raws li sawv daws pom ne, peb txoj kab ke pam tuag niaj hnub no puas tau ntxim sawv daws siab nyiam ? a. Muaj tej yam ntxim sawv daws siab lawm, yog dab tsi, sawv daws puas sib faib tau tswv yim los sib tham ua ke ? b. Muaj dab tsi, tshuav dab tsi yus pom tsis zoo, sawv daws muab tham kom tas ua ke puas tau ? c. Muaj tej yam yuav tau khaws ua mus twj ywm, yog dab tsi, yog yam twg... d. Muaj tej yam yuav tsum tau kho rau kom zoo nkauj, yog tej yam zoo li cas ? Tej yam yuav tso tseg, tsis txhob ua ? Yog muaj tej yam yus nyiam yuav txhab rau peb txoj kab ke pam tuag, yog zoo li cas ? 5‐ Puas muaj lwm yam lus tseem ceeb sawv daws xav tham txog ? Ntawm no, yog ib co lus pab sawv daws xav tswm yim xwb. Xav thov cov coj xub tham qhia nyias pab pawg ntseeg kom sawv daws sib tham ua ntej nyob ntawm nyias xeev ntuj yim huab yuav zoo. Xav thov sawv daws sib pab dag pab zog thiab pab tswv yim. Txog hnub peb sab laj, cov coj nej tuaj, nej yog cov ntseeg lub suab lub tswv yim. Peb thiaj li sib pab kho ua ke peb txoj kab ke pam tuag rau peb tau siv kom sai thiab zoo nkauj raws li ib tsoom ntseeg lub siab nyiam thiab lub siab xav. Thov kom leej Ntuj Plig Ntshiab lub zog pab sawv daws. Cov coj thiab saib xyuas kev ntseeg.
Aumônerie Hmong de France – TP Cwj Vuam Chiv – P. Antoine 25, rue du Cdt Jean Duhail 94120 Fontenay sous Bois - Tél. 01.48.75.81.02 / 06.58.01.31.82