Corintosha keranguemulachi

Pabloꞌ pilla kiika pallu

1

1   Iya

Uraꞌ dechusa tindu

Pablo, Diosren tsaa mutyañuya, Jesucristochi kuinda kenu laraꞌ eramu ruku, in keranguemu naatala Timoteoba Corinto pebulusha Diosnu kerangueꞌ waku wakudimulanu bain, naa vejanla Acaya tusha keranguen chumulanu bain uraꞌ dejusa tindetsuyu. 2 Lalaꞌ Apa Dios bain, naa Bale Ruku Jesucristo bain ñullanu estyaꞌ keewareꞌ nejuu tiba bulla jutyu chujtiꞌ jintsusa tenve.  

3 Lalaꞌ

Pabloꞌ llaki-iꞌ depuiñu kuinda

Bale Ruku Jesucristoꞌ Apa Diosnu mika urave tisai; yaa lalanu mika tenbityamu juve, tsenmin masundyawaamu Apa juve. 4 Yaa lala tyeeba de-iꞌ llaki juu dechuñu bain masundyawaamu juve, tsenmalaa lalanu Dios naakeꞌ masundyawaamuñuba, laa bain tsaren keꞌ veela tyeeba de-iꞌ llaki juu dechunmala masundyawaamu junudetsu. 5 Naajuinga Cristo naa-i taaju imuwaañuba lalanu bain tsanguenuu janmalaya tsangue taaju kendetsuñu bain, Cristoren lalanu tsamantsangue masundyawaamu juve. 6 Tsejtu lala taaju de-iꞌ pullantsumiya ñullanu masundyawaakenuu bain, tsenmin ñuichi uraanuu bain juntsaaya kendetsuyu, tsajuꞌ lalanu bain Dios masundyawaamu jumiya naa ñullanu bain tsaren masundyawaanu tsuve, tsenmalaa naa ñui bain lala ti taaju juuya de-iñuba tsaren iꞌ bain tiba jutyuren jintsunudetsu. 7 Uwain lalaya ñulla tiba taaju de-induba keengues jintsunu juve pensa dejuyu, matyu ñulla laaba tsaren taaju kivetentsumiya, tsaren masundyaveꞌmu deeñuꞌ mitya. 8 Keranguemu naatalala, lala Asia tusha naake taaju keꞌ puimuwaañuba juntsa tengaya judei. Junga mika taaju keꞌ pullandu, lalaꞌ pudenguraya deketuren naaken tsaa tiyaꞌ, umaa peyakeenu juve pensa kemuwa deeyu, 9 matyu peyanbera inu dejuyu pensanguemuwa deeyu. Tsaaren entsaa  

 

 

 

 

 

557

2 CORINTIOS 1  558

puimiya ne lalaꞌ pudenguraa kiikeꞌ livee inu dejuyu pensanguityuꞌ, Diosnaa keetadiꞌ tiba lalanu uraꞌ kemishtinu juve tyakaanaa tsaive. Diosya naa pemulanu bain mangujtemu juve. 10 Tsajuꞌ naa uwain tituba iꞌ peyainuu dejuñuba Diosya lalanu livee keꞌ mitya, livee keꞌ jintsunu juve. Uwain Dios lalanu livee keꞌ jintsunu juve pensa deeyu, 11 ñulla lalaꞌ mitya Diosba kuinda keꞌ papatindetsushu juntsaa. Tsajuꞌ pureꞌ chachilla lalaꞌ mitya Diosba kuinda kiidekenmala, lala Dioschi tiba uraꞌ de-iꞌ pullanmalaya, pureꞌ chachilla juntsaꞌ mityaren Diosnu yuj urave tiꞌ papatinu detsuve.  

 

Nenñaa Pablo Corinto pebulusha jityuꞌba wainmi.

12 Lala

tiꞌ mityaaba dajtyanuu jumiya entsaꞌ mityaa tsandyanuu dejuyu: lala uwain tiba urajtu juuya kindetyuꞌ, naa anbutitiñuu bain kindetyuñuba lalaꞌ tenbuꞌ pensaren tsandyakaantsuñuꞌ mityaa dajtyainuu dejuyu. Ura patiñuya, lala ñullanaa tsa dekeꞌ uraꞌ kiiken chumuwa deeyu. Tsejtu lalaya ne chaꞌ pensa naajuñuba juntsanu keetadiꞌ jityumujchi, Diosya mika aa ura juñu, juntsanaa keetadiꞌ uwain uraa kekaanu tsuve tenna dejuyu. 13 Entsangueꞌ piikendetsuꞌ bain ne ñuichi naakeꞌ lenguen tsaa, tsenmin naakeꞌ aseetanguen tsaa kiika piikindetyuyu. Tsajuꞌ millangue aseetanguenuu dejuve pensa juyu 14 tyee millangue aseetanguindetyuꞌba. Tsajuꞌ challa ñulla lalaꞌ mitya mika sunden junu dejuve, bene Jesucristo maanmala lala naajuꞌ ñullaꞌ mitya sunden junu deeñuba juntsaatu. 15 Tsejtu tsaanu dejuve tenna pensangueꞌ mityaa, ñullaꞌ junga ajkeꞌ vijaꞌ keenu pensanguiyu, tsejtaa maandu ñullaꞌ junga mavijaꞌ, tsaa pai bijee jaꞌ uraꞌ de-ikaanu; 16 ura pañuya, ajkeꞌ jamiya, Macedoniasha jindaa vijaꞌ keenu pensanguiyu, tsenmin junga puꞌ maandu bain mavijaꞌ keenu pensanguiyu, tsenmalaa iya Judeasha miintsunmala ñulla inu ajkesha miikaanuu kenudetsu. 17 ¿Tsejtu iya entsainu pensangueꞌ bain urake pensanguiꞌmujchin ne tsandyatu iwa? Tsa jutyuꞌba, ¿ñullaya iya ne chachilla naake pensanguemu deeñuba, tsajuꞌ ne padandaa jutu, naa uwain tsanguenu tiꞌ bain, tsanguen jutyu mandimuve pensaa dejuu? 18 Matyu Diosya mive, ne ñullanu lala ti depañu bain lalaꞌ palaaya ne ñulla “tsaave” tyainuu bain, naa “tsa jutyuve” tyainuu bain dejutyuñuba. 19 Matyu naa Silvano bain, naa Timoteo bain, naa i bain ñullaꞌ kejtsapala yaꞌ kuinda mijakaañu jumulanu bain Diosaꞌ Na Jesucristoya ne “tsanguenu tsuyu” tituren “tsanguen jutyuyu” tiitityu juve; tsa jutyuꞌ, yaa naa-uwanuba “tsanguenu tsuyu” tene pamuve. 20 Diosya tyee tsanguenbera kenu tsuyu timu juꞌba ti bain Cristoꞌ mityaa tsa tsangue dekeꞌ puimuve. Tsaꞌ mityaa lala naa-uwanu bain Cristoꞌ mityaa Diosnu yuj urave tiꞌ “tsaasa” tiitimu deeyu. 21 Diosya lalanu Cristoba narake buuteꞌ tanamu juve, naa lalanu bain, naa ñullanu bain, tsenmin yaa lalanu yachin juu detireve. 22 Tsangueꞌ lalanu ti kunu tsuyu tiꞌba uwain kanu detsuve tiꞌ keewaatu, yaꞌ Espíritu Santonaa lalaꞌ tenbukasha chujtive. 23 Tsaaren iya naa-intsunu pensaꞌba juntsaa indyuꞌ kayu Corintosha majaindyumiya, ñullanu uraꞌ kenu tenñaa tsaayu. Tsajuꞌ i anbutintsushu  

 

 

 

 

 

 

 

 

 

 

 559

2 CORINTIOS 1​, ​2

juntsaa Dios inu tuꞌsa tiꞌ, iya maaliren pakaꞌ uwain juntsaave tiꞌ, naa Dios bain uwain iya anbutindyuñuba yaa mive tintsuyu. 24 Ne lalaa ñullanu tsa tsangue keenguidei tiꞌ panu pensa dejutyuyu; ñulla yumaa tinaa keengueꞌ bain feeteꞌ dejuve. Tsaañuꞌ mitya, lalaꞌ pensaya ñullanu naaketaa sundyawaanu dejuꞌba juntsaaya kayu aa kenu pensa deeyu. 1  Tsaꞌ mityaa ñullaꞌ junga kama bijee majaꞌ kereꞌ bain, vetaꞌ vetaꞌ llakindyainuu jumiya jan jutyu pensanguiyu, 2 matyu iya ñullanu llakinbajteꞌbanguishu juntsaa, ¿maa inu masundyawaakenuu dejun, ñulla in llakinbajtenu chachillaren inu masundyawaakenuu dejuiꞌshu juntsaya? 3 Tsaꞌ mityaa entsangueꞌ piikiyu, tsenmalaa iya ñullaꞌ junga janmala, ñulla inu sundyawaakenuu jumulaa ne llakinbajtekenuuya kiꞌnudetsu. Ura pensanguiñuya, iya naa-i sundyañuba ñui bain juntsai sunden junu dejuve tyamuwaayu. 4 Tsaaren iya juntsa kiika piikendu pureꞌ pensaa juꞌ, mika llaki jutu warendindu piikemuwaayu. Tsejturen ne juntsa kiika ñullanu piikeꞌ ereꞌ bain ne llakinguikaakenu erendyuyu, iya naa-i estyamuꞌba juntsa dekeewaanaa tsanguiyu.  

2

 

 

 

 

Pablo yanu firuꞌ pamunu kuipa pun jutyu tiyami.

5 Mun llakindyainuu keꞌ bain ne inuren tsandyainuu kendyuve, naa ura

tsamantsandi patyuꞌba, kumuinchi ñullanu bain tsaren llakindyainuu kive titundiyu. 6 Ñulla pureꞌ chachilla juntsa rukunu yumaa tiba taaju de-iwareꞌ puiteñu jumuren mikave. 7 Tsejtu umaa yanu juntsaꞌ mityaya kuipa faawarajtu demandireꞌ, yanu sundenna pensa juuya mandiredei. Tsa dekiꞌñu tsamantsa llakindyaꞌ naa-in tsandyaꞌba imive. 8 Tsaañuꞌ mitya ñulla yanu naa-i estyamuwa dejuꞌ bain juntsai ma-estyadei tiꞌ uꞌtandinu tenve. 9 Kaspele piiketu bain iya naatiñuba juntsaatala bain tsangue demeengueꞌ juntsangue dekiñuba mijanu tenñaa piikiwayu. 10 Tsaꞌ mitya ne ñulla maa tyeeba keꞌ ujcha lañuba juntsanu yaꞌ ujchaꞌ mitya kuipa pun jutyuyu detiñu bain, inchi bain tsaren junu tsuve. Tsajuꞌ inchi tsanguenuuba juñu, iya yaꞌ ujchaꞌ mitya kuipa pun jutyuyu timiya, ñuichi uraa kenaa tsanguenu juyu Cristoꞌ ajuusha. 11 Tsenmalaa lalanu Satanás naa tyeeba uu naꞌbaasa kenuu faañuba, tiba kikenuu jun jutyuve, matyu ya tyee firuꞌ kenu tyamuñu bain yumaa keemi deeyu.  

 

 

 

 

 

12 Iya

Tróade pebulunu Pablo uraꞌ puityumi.

Tróade pebulubi Cristoꞌ mika ura kuinda mijakaanu vijiñu, naa Bale Rukuchi kenu taawasha uu tsanguenuu faañuba, 13 junu sunden pensa jutyu puwayu in keranguemu naatala Titonu mangatatyuꞌ mitya. Tsejtu yalanu uraꞌ chudei tiꞌ shuiketu Macedonia pruvinsiasha jiwayu.  

14 Diosnu

Cristoba jutaa bengaꞌ tyuliꞌ jinu

yuj urave tintsuyu, yaa Cristo depullaꞌ jintsuñu, lalanu bain naa-uwanuba yaꞌ bendala jikaamu juñu, tsenmin lalanaa veelanu Cristoꞌ kuinda mijakaakarentsuꞌ, tyeeba juꞌ aindyayaaba juñu nukaba aindyu

2 CORINTIOS 2​, ​3  560

de-ishkakeñuu kikaantsuñu. 15 Matyu lalaa Dioschi aindyunguikaantsumi Cristo juꞌkeꞌ keewaañu aindyu ishkakara juuñu deeyu, tsenñu naa livee inuu jumulaꞌ kejtsapala bain, naa livee in jutyulaꞌ kejtsapala bain juntsa aindyu deshajaraꞌ jiiñuu imuve. 16 Tsenñu livee in jutyuu jumu chachillachiya entsa ishkakara pemu pudyuu juꞌ peyanu tsuve tiꞌ keewara juve, tsaaren livee inuu chachillachiya entsa aindyu ishkakara, chumulaꞌ aindyu juu juꞌ, chunu detsuve tiꞌ keewara juve. ¿Tsaaren maa juntsa aindyu ishkakara juuñuu kes nenuu juchunga? 17 Lalaya Diosaꞌ palaa mijakares nendu ne laachi uraanuu kenu miꞌkes nendetyuyu, naa veelaya pureꞌ tsangues nendetsuñu bain, lalaya Dioschi ti bain naajuñuba tsa tsandi depaꞌ firuꞌ pensaba jutyu pas nemu deeyu, lalaya yaꞌ ajuusha tsangues neneinaa era deꞌ mitya, tsenmin lalaya Cristoba debuunaꞌ yaba ma bulu judeꞌ mitya.  

 

 

3

Naajutaa Diosba uraꞌ junuu juꞌba

1   Lala

entsanditu, ¿ne laa teneren balengureꞌ patiñundindetsuwa? Tsa jutyuꞌba, ¿vejanla naakemu deeñuba juntsangueꞌ, lala uraꞌ kiikemu dejuve tiꞌ piikeñu kiika ñullanaa kuwanuj deewa, tsa jutyuꞌba, ñullanaa pakeꞌ lalanu kuwaka tinuj deewa? 2 Ñullaa laachiya, tsa deeve tiꞌ depiikeñu kiika juuñu dejuꞌ, lalaꞌ tenbukasha pillaañuu kiika deeve, tsenñu kumuinchi kera dejuꞌ lenmu deeve. 3 Matyu ñullaa Cristochiren piikiñu kiika juuñu dejuꞌ, lalaꞌ mityaa juntsa-iꞌ kuwaañuu jumula deeve, tsaaren ne kiikanu naake piikemu deeñuba juntsa pilla jutyuꞌ, chumu Diosaꞌ Espírituchiren tsa pilla juve, tsenmin ne shupuꞌ taꞌpanu pillaa bain jutyuꞌ, tenbuꞌ allanun ma pillaa jumu deeve. 4 Entsaamiya Cristoba bulu dejuꞌ mityaa, Diosaꞌ ajuusha uwain juntsaave pensa dejuyu. 5 Tsejturen ne ti kikeꞌba laa teneren tsa tsangue kenuu dejuꞌ mityaa tsangue dekiyu tyanu dejutyuyu, lala tyee keꞌba Dios tsanguikaañaa tsa dekiyu. 6 Yaa lalanu juntsa kama bijee Dios chachillaba vetaꞌ vetaꞌ tsanguedaa tinu jumunu tsa tsanguiveteꞌ jiinuu tireve, ne lei naaju pillañuba juntsa jutyuꞌ, Espíritaa naa naakenu tireñuba juntsaaya kes jinu. Leiya peyawaanaa tireñuba, Diosaꞌ Espírituya lalanu chuwaanaa tireve. 7-9 Diosya shupuꞌ lepanaa yaꞌ lei jumula depiikeꞌ Moisésnu kuwave. Tsenñu juntsa uwanu tsamantsanguentsumuwaañu, naa Moisésꞌ kajuu bain tsamantsa piꞌkelaa tiyañu, Israel chachilla naakeꞌ yaꞌ kajuunu keran tsaa tiyaila. Tsejturen juntsa piꞌkelaa jumu jei manbiyanuuren ne tsaawaami. Tsajuꞌ juntsa lei kuwanduren tsamantsa piꞌkela kentsumuwaashu juntsaa ¿liveeju tiyanu dejuve tiñu kuinda mijakaraa kayu naaju tsamantsaa keewara juiꞌchunga? Matyu juntsa leiya, lalaꞌ ujchaꞌ mityan lala peyanuuya dejuve tive. Tsaanuren lalanu Espíritu Santo tyee kikaañuba juntsan mityaya lalanu Dios ti ujchaba dejutyu kureve. 10 Kaspele ajkeꞌ tsamantsa piꞌkelaa katawamuya, challa kayu tsamantsa piꞌkelaa jumuba pensangueñuya, juiꞌñuba ne uraa tiyaive. 11 Tsajuꞌ ka jayuꞌ mitya tsaiꞌ ne  

 

 

 

 

 

 

 

 561

2 CORINTIOS 3​, ​4

manbiyainuu jumuren tsamantsaindu keewaramuwaashu juntsaa, ¿naauwanuba tsananuu jumaa kayu naaju tsamantsaa juiꞌchunga? 12 Tsejtu uwain juntsaave pensa dejuꞌ mitya, Diosaꞌ palaa nukaba jaiba jela putyu pas nendetsuyu. 13 Tsaaren lalaya Moisés naakemuwaañuba tsanguityu deeyu: yaa Dios tsanguikaañu piꞌkelaa jumuchi yaꞌ kajuu piꞌkelaa juꞌ, Israel chachilla juntsa pidya jayu jayu manbiyantsuñu dekatatyusa tyatu, tsaa yaꞌ kajuunu jalichi pujchikemuwaave. 14 Tsaaren Israel chachillaya aseetanguenuꞌ jutyuu tiyaila, tsa dejuꞌ naa chaikama bain aseeta dejutyuꞌ, yalaꞌ pensa pujchaañuu dejuꞌ mangayajdetuꞌ mitya, Dios chachillaba vetaꞌ vetaꞌ tsanguedaa tiñu yumaa jumu pilla kiikanu lenmiya aseetanguityu deeve, matyu Cristoren juntsa vinamu jali mangakeñuu keꞌ aseetanguikaamu juuñuꞌ mitya. 15 Tsaꞌ mityaa naa chaikama bain Moiséschi pilla kiikalanu lenmiya aseetanguityu deeve, yalaꞌ pensasha ma jali daaviyanañuu dejuꞌ mitya. 16 Tsaaren mulaa Bale Rukunu keenguemu tiyamiya juntsa yaꞌ pensasha daayanañuu jumu jali mangayaꞌ keviiñuu-iꞌ aseetanguemu tiyamu juve. 17 Juntsa Bale Rukuya Espírituren juve, tsaañuꞌ mitya nuka Bale Rukuꞌ Espíritu puñu bain junuya nejuu liveeju dechuyu. 18 Tsenñu umaa lala kumuinchi lalaꞌ kajuusha tiba dukaañuu jutyu tiyalaya Bale Rukuꞌ piꞌkelaa jumu kerendetsuyu, a tsejtu ya tsaañuu juꞌ piꞌkelaañuu tiyaꞌ jinchi ne iindetsuyu, Bale Rukuꞌ Espírituren tsanguikaañu.  

 

 

 

 

 

 

4

1   Tsaꞌ

Jesucristoꞌ kuinda mijakaamula

mitya Dios lalanu tenbityaꞌ entsangues nenu tireñuya, ipijpajtyaiñuu iꞌ dyanu kendetyuyu. 2 Lalaya tiba yujtyanchin pantsudinuu jumulaya kityu deeyu, tsajuꞌ lalaya bibuꞌ keꞌ anbuda keewares neba indetyuyu, tsenmin Diosaꞌ palaa mijakares nendu bain ne veraꞌ manbatis nendetyuyu. Tsa jutyuꞌ, lalaya naajuñuba uwain tsandita nendetsuyu, tsejtaa lala naaju chachillaꞌ kerachiba lalaꞌ tenbuꞌ pensasha ti ujchaba tajtu katawanu Diosaꞌ ajuusha. 3 Tsaaren juntsa Diosaꞌ mika ura kuinda aseeta ityu juꞌ jalichi daaviyaañuu jushu juntsaa, livee ityuꞌ piyainuu jumu chachillachin juntsaañuu juuve. 4 Cristoꞌ mika ura kuindaya ya naaju tsamantsaa juꞌba juntsaatala laapuꞌ pamuve, tsenmin Cristoren Dios naaju tsamantsaa juñuba juntsaa keewara juve. Entsa mika ura kuindaya ñillu juuñuu danjuru kentsuñu bain, keranguityu chachillaya katatyu deeve, matyu yaichi Dios juuñuu mandanguen chuꞌ firuꞌ kekaamuya katakaatyu juñuꞌ mitya. 5 Tsejtu lalaya maali uraꞌ katawachi tenñu kuinda juu pas nendetyuyu; tsa jutyuꞌ, Jesucristonu laapuꞌ paꞌ lalaꞌ Bale Rukuve tis nendetsuyu, tsenmala lalaya ñuichi tiba kiikemu juuya kurandetsuyu, Jesúsnu estyaꞌ yaꞌ taawasha kes nendetsuꞌ mityaren. 6 Matyu kaspele  

 

 

 

 

a 3.18 kerendetsuyu tityumujchi, veelanu keewares jintsaindetsuyu tiꞌ aseetanguikara bain junu juve.

2 CORINTIOS 4​, ​5  562

dishkejtsa tene juunuren danguisa timu Diosren naa lalaꞌ pensasha bain dangaakeñuu kive, tsenmalaa laa bain veelanu dangaamu junudetsu, Dios naajuꞌ tsamantsaa juñuba Jesucristoꞌ mityan juntsaa dekeemijakaandu. Taaju induba keranguen chunu

7 Tsaaren

lala entsa tsamantsa balee jumu lalaꞌ bulunaa chujtiꞌ tanañu denayu, tsejtu tu piyama juuñuu jumu lalaꞌ bulunaa uukareꞌ detanayu, tsenmalaa entsa tsamantsaa pudee lalanaa faleꞌ jamu jutyuñu, Diosnaa faleꞌ jamuñuba tsangue keewaanutsu. 8 Tsaꞌ mityaa naa ti peletuba detaa chuꞌ bain, naaken tsaa dechutyuyu, tsenmin titalaba pensaa chuꞌ bain, naa-ichunga tyan dechutyuyu. 9 Lalanu firuꞌ kenu bendaa deneñu bain, ne laa tene juu dejutyuyu; naa lalanu detsun-ereꞌ bain, petse petse keꞌ tsungaañuuya kindetyuve. 10-11 Lala nuka ji-iꞌ bain, Jesús naa-i taaju in chumuwaañuba laa bain juntsa taajuren in chuñuu katawandetsuyu, tsajuꞌ Jesúsnu meenguendetsuꞌ mityaa naa-uwanuba peyainuu is nendetsuyu. Tsenmin lalanu keekituren mijanu dejuve naa Jesúsya pemulanu bain manchuwaanuu juñuba. 12 Entsaañuꞌ mityaa lalaya peyainuuya indetsuñuba, ñullaya chunuuya indetsuve. 13 Diosaꞌ Kiikanu entsandive: Uwain tsaave tenna keenguiyu, tsaꞌ mityaa payu, b tiꞌ pillave. Tsenñu laa bain tsaren uwain tsaave tyaꞌ dekeengueꞌ mityaa pamu deeyu. 14 Tsenmin lala mideeyu naa Bale Ruku Jesús peyañu mangujtemu Diosren, naa lalanu bain Jesúsnu naakeꞌ mangujtemu juꞌba tsangueꞌ ñuiba buluren lalanu yaꞌ chuinsha miyaꞌ jinuuñu bain. 15 Tsejtu kumuinchi entsaa de-iꞌ puintsumiya ñuichi uraanuu itaa tsaive, tsenmalaa pureꞌ chachilla Dioschi tiba uraꞌ indetsunmala, tsaren pureꞌ chachilla Diosnu yuj urave tinudetsu, tsangueꞌ Diosnu tsamantsa aawa juve tiꞌ keewaanu. 16 Tsenñuꞌ mityaa ipijpajtyaiñuu ityuꞌ jintsuꞌ, naamika lalaꞌ buluya rukuꞌ kantsuñuba, lalaꞌ tainsha pensaya malumere kasa mandiyaꞌ jijiintsuñuu kiikendetsuyu. 17 Entsa tusha taaju in chudenaashu juntsalaya, naa taajuꞌ bain, maratu jei puimu ne juuve, tsejturen tsangue taaju kentsuꞌba, bene tsamantsa naraa naa-uwanuba de-ityu juuya kakaanu junu tsuve. 18 Tsajuꞌ lalaya challa tiba katawamu judeeshu juntsalanuya keetyuñuu dejuꞌ, chaiba tiba kataatyu jumulanaa keekiñuu kemu deeyu. Tiba katawamulaya mandinbu de-iꞌ pullañu bain, kataatyu jumulaya naauwanuba tsanamu deeve.  

 

 

 

 

 

 

 

 

 

5

1   Lalaꞌ

Selushaa chunu dekeenayu.

bulu jumaa entsa tusha chuntsumi kaa yapaya juuñuu juꞌ, mandinbu mushanu juñu bain lala mideeyu, tsaaren naa tsaiñu bain, Diosya kaiꞌsha laachi vee bulu naa-uwanuba mushatyu ya juuñuu, chaꞌ b 4.13 Salmo 116.10

 563

2 CORINTIOS 5

tyaapachi keñu jutyu keꞌ tanañuba lala mideeyu. 2 Tsaꞌ mityaa lalaꞌ bulunu chungamaya selusha bulu jumaa lala peyaindyuren lalanu pajaꞌ espirituꞌ bulu pandekiñunguisa tendu aitendyuu chudenayu, 3 tsenmalaa espirituchi tene panakeñunguimiya tiba panajtuuñuu tiyan jutyu. 4 Tsejtu lala entsa yapaya juuñuu jumu lalaꞌ bulunu chungamaya llaki ishiken dechuyu, lalaꞌ bulunu kalaꞌ keviiñuu in jutyu tenñu, tsenmalaa peyainuu jumu lalaꞌ bulunu chumujchiren peyatyu kasa bulu juuya mandiyanu tenñu. 5 Tsenmin Diosya lalanu tsaa dejunu tireve, tsejtaa bene lala tyee inu deeñuba uwain tsaa puinu juve tiꞌ keewaataa Espíritu Santo lalanu kuwave. 6 Tsaꞌ mityaa lala naa-uwanuba uwain tsainu tsuve pensaa dechuyu. Tsejtu lala mideeyu naa lalaꞌ bulunu chumiya Bale Rukuba kalen chutyuñuu dejuꞌba. 7 Tsajuꞌ challaya yanu katandetsutyuꞌ bain, yanu keengueꞌ jindetsuꞌ mityaa tsaa jindetsuyu. 8 Tsaaren lala tyee dekeenaꞌba uwain tsainu tsuve pensa dekeenayu, tsejturen uwain tsainu ajchundenmiya challa chudenaashu juntsa bulunuya shuikeꞌ jiꞌ, lalaꞌ Bale Rukubaa chuinu tenve. 9 Tsajuꞌ lala ti kikeꞌba Bale Rukunu sundyawaakenuu kiikentsunuuya dejuyu, chaiba lalaꞌ bulunun chuꞌ jintsuꞌ bain, naa lalaꞌ bulunu shuikeꞌ ji-iꞌ bain. 10 Lala kumuinchi Cristoꞌ kavitu kensha jinu detsuyu, tsejtaa lalaꞌ bulunu chungama main main tyee uraa kiiken chumu dejuꞌ bain, tyee urajtu kiiken chumu dejuꞌ bain juntsan mitya tsa tsangue kanu dejuꞌ mitya.  

 

 

 

 

 

 

 

 

11 Tsajuꞌ

Chachilla Diosba uraꞌ mandiyanu kuinda

lala Bale Rukunu naake balengureꞌ keewaanuu juñuba mimiya, chachillanu yaꞌ palaa mijakareꞌ keenguikaanu kiikendetsuyu. Uwain Diosya lala mu deeñu bain uraꞌ kerañu, ñui bain lalanu juntsai dekeemijave pensa dejuyu. 12 Lala entsanditu, ne laa teneren balengureꞌ manbatiñundindetyuyu; tsa jutyuꞌ, ñulla lalaꞌ mitya dedajtyasa tenñaa tsandindetsuyu, tsenmalaa yalaꞌ tenbukashaya tsaa pensajturen tsaañungue keewareꞌ dajtyamulanu ñulla pakaꞌ patinuu junudetsu. 13 Tsajuꞌ lala ñullaꞌ ajuushaya yujka juuñuu dejuꞌ bain, Diosaꞌ mityaa tsaanu detsuyu; tsaaren yujka juuñuu dejutyushu juntsaa, ñullaꞌ mityaa tsaanu detsuyu. 14 Cristo lalanu estyamu juñu aseetangueꞌ mityaren, lala challa tyee kiiken dechuꞌba juntsaa detiyayu, entsanu pensanguetu: main kumuinchi chachillaꞌ mitya peyanmala, kumuinchi chachilla bain pemu tene kuraa dejuve. 15 Cristoya kumuinchi chachillaꞌ mitya peyave, tsenmalaa naaju chachilla liveeju dechuꞌ bain ne maali yalaꞌ mityaa chuyu tyatyuꞌ, yalaꞌ mityaa peyaturen mangujtamu rukuchee chuyu tyanudetsu. 16 Tsaꞌ mitya umaa lalaya munu bain chachilla naake pensangueꞌ keemu deeñuba tsanguityu deeyu; naamika kaspelee Cristonu bain tsangue pensangueꞌ keemu dejuꞌba, challaya tsanguityu deeyu. 17 Tsajuꞌ mun Cristoba buunaꞌ bain kasa chachi majuuve; tiba yumaa kiikeñu jumulaya de-iꞌ pullanmala challaya tiba kasa tene majuuve.  

 

 

 

 

 

2 CORINTIOS 5​, ​6  564 18 Kumuinchi

entsaya Dios tene tsanguikareꞌ lalanu Cristoꞌ mityaren yaba uraꞌ mandiyaa tireve. Tsanguetu lalanuya naajulanu bain yaba uraꞌ mandikaakenuu taawashaa kenu shuikive. 19 Ura patiñuya, Diosya Cristoꞌ mityaren tusha chumu chachillanu yaba uraꞌ juunuu demandirenu tireve, naamika chachilla ujcha lamu deeñu bain, tsaatalaya keeminchanguive, tsejtu lalanaa chachillanu entsaa kuinda mijakares nenu uudenguive. 20 Tsenñaa lala Cristoꞌ mitya kuinda mijakares nemu deeñu, Diosren yanu keenguidei tiꞌ ma patiñundintsuve lalanu pakaatu. Tsenñu lala Cristoꞌ mitya tiꞌ, Diosba uraꞌ mandikutidei tiitimu deeyu. 21 Cristoya ti ujchaba kindyuve, tsaanuren lalaꞌ ujchaꞌ mityan Dios yanu ujcha kiikemunu ken tsanguive, tsanguitaa Cristoꞌ mityaren lalanu Dioschi ti kuipaba jutyu tirenu. 1  Tsajuꞌ lala Dioschi taawasha kemu deetu, Diosya mika aa ura jutu ñullanu naake uraꞌ kenu tyañuba ñulla tsaikutin jutyuuya jutyudei tindetsuyu. 2 Matyu Diosya yaꞌ kiikanu entsandive: Iya tsanguendyanu uwanu ñunu meeyu, tsenmin livee inu malunu ñunu laꞌkayu, c tiꞌ pillave. Tsenñu challaa juntsa tsanguenuu maluve. ¡Umaa livee inuu maluve! 3 Lalaya munuba firuꞌ ikaakenuuya kindetyuyu, tsenmalaa lalaꞌ taawasha naa muchi bain firuꞌ juuñuu katawaiꞌnutsu. 4 Tsa jutyuꞌ, lala ti kikeꞌ bain Dioschi taawasha kiikemu juuya keewaandetsuyu, naa dyaiꞌmujchi tiba tsa tsanguentsunu junchi bain, naa taaju kikenuu faañu bain, naa tiba tajtu jujuꞌ bain, naa tituba indu naaken tsandentsu bain, 5 naa debandandu bain, naa peesu vi-iꞌ bain, naa jutikaandu bain, naa taajuꞌ taawasha kendu bain, naa kasujtu dechayandu bain, naa mandinbupu tiba fajtuu puindu bain, 6 tsenmin lala deechuꞌ chunchi bain Dioschi taawasha kiikemu juu keewarendetsuyu, naa tiba anbuda jutyu minchi bain, naa tiba induba keeminchaañuu junchi bain, naa aa ura junchi bain, naa Espíritu Santo lalanu puñuꞌ mitya bain, naa lala munu bain uwain estyaꞌ keewarendu bain, 7 naa lalaꞌ kuinda anbuda jutyun mitya bain, naa lalanu chumu Diosaꞌ pudeeꞌ mitya bain Dioschi taawasha kiikemu juuya keewaawaa dekiyu. Tsejtu lalaya tiba uraꞌ kiikenchee balelaꞌ laꞌkamu deeyu, naa vinguijiiñu-iꞌ bain, naa lalanu dekijañu vinguikakeñungueꞌ bain. 8 Mandinbupu lalanu balengureꞌ pamu dejuꞌ bain, mandinbupu kentsureꞌ pamu deeve; mandinbupu lalaꞌ mitya uraꞌ patiꞌ bain, mandinbupu firuꞌ pamu deeve. Tsenmin naa lalaya anbukuinda juuya patyu deeñu bain, anbukuinda kes nemulanu naake firuꞌ kemu dejuꞌba lalanu tsanguemu deeve. 9 Naa veelaya lalanu bale ruku juu kuretyu deeñu bain, mantsalaya uwain bale ruku juu kuremu deeve; d naa  

 

 

6

 

 

 

 

 

 

 

 

 

c 6.2 Isaías 49.8 d 6.9 Naa veelaya lalanu bale ruku juu kuretyu deeñu bain, mantsalaya uwain bale ruku juu kuremu deeve tityumujchi, Lalanu uraꞌ kera dejuꞌ bain, kerajtu chacheeba dejuñu ken tsanguemu deeve tiꞌ aseetanguikara bain junu juve.

 565

2 CORINTIOS 6​, ​7

peyaañuu dejuꞌ bain, peyaiꞌmujchin dechuyu; naa lalanu taaju de-iwareꞌ puiteꞌ bain, tutendetyuve; 10 naa llaki kuraa dejuꞌ bain, naa-uwanuba sunden dechuyu; naa pure chachi kuraa dejuꞌ bain, veelanuya tarukuuñuu tiwaandetsuyu; naa tiba tajtuuñuu dejuꞌ bain, tiba detaañuuren tsa deeyu. 11 Corintosha keranguen chumu naatalala, lalaya ñullanu naati panuu juñuba tsandi depayu, tsejtu ñullanu naa-i estyanuu juñuba tsa dekiyu. 12 Lalaya ñullanu naa-i estyanuu juñuba juntsai estyandetsu bain, ñullaa lalanu juntsai estyaindetyuve. 13 Tsaꞌ mitya ñui bain tsa deesa tenñu, apala yaꞌ kaillanu naatimu deeñuba tsandipaꞌ uꞌtandinu tenve, ñui bain i ñullanu naa-i estyamuñu bain juntsa deesa tenñu.  

 

 

 

Lalaa Diosaꞌ pupunanu ya juuñu deeyu.

14 Keranguityulabaya

vetaꞌ vetaꞌ tiba kiiken chumu tiyanu kityudei; ñullaya yaiba ma pensaa dejutyuve. ¿Nejtaa manbarejuu junu dejun tiba ura jumu, urajtu jumuba? Tsenmin, ¿nejtaa danjuruu jumu, yapijuruu jumuba buudinuu jun? 15 Tsenmin, ¿nejtaa Cristo, Dyabuluba buudinuu jun? ¿Naa keenguemu chachi bain, nejtaa keranguityu chachiba manbarejuu dejun? 16 Lalaa Diosaꞌ pupunanu ya juuñu deeñu, Dios lalanaa chushu juntsaa, chi dyuslanuya keeminchaanu dejuyu, Diosren entsandimuñuꞌ mitya: Iya yaiba chuꞌ, yalaꞌ kejtsapala nenu tsuyu. Iya yalaꞌ Dios junu tsuyu, tsenmala yalaa in chachi junu detsuve, e timuwaave. 17 Tsenmin Bale Ruku entsa bain entsandive: Juntsa chachillaꞌ kejtsapalaya maluꞌ mijiꞌ bakaꞌ jiidei; Dioschi urajtu kurekaamu juulanuya jaiba taꞌkatyudei. f Tsenmalaa iya ñullanu mikaꞌ inchi tirenu tsuyu. g 18 Tsejtu iya ñuichi Apa junu tsuyu, tsenmala ñullaya in nala bain, in naꞌmala bain junu detsuve, tive tiba kekaamu Bale Ruku, h tiꞌ pillave. 1  Tsajuꞌ estennu keranguemu naatalala, entsaa jumulaa yaren uwain tsanguenbera kenu tsuyu tinu palaa jumu lala mimiya, lalanu tyee Dioschi firuꞌ kurekaakenuu juñuba juntsa kityuꞌ, naa lalaꞌ bulunu bain, naa lalaꞌ aamanu bain ujcha maiꞌtekeñuu kityuꞌ, Diosnu naake balengureꞌ keewaanuu juñuba tsangueꞌ yachin juu detiyanaa kiikentsusai.  

 

 

7

 

Corintonu chumu keranguemulaꞌ mitya Pablo sundyami.

2 ¡Lalanu

bain estyaꞌ mikakai! Lalaya munu bain tyeeba tsanguen jutyuu kindetyuyu, munu bain tituba pensa judandaa mandirendetyuyu, e 6.16 Éxodo 37.27; Levítico 26.12 Samuel 7.8, 14

f 6.17 Isaías 52.11

g 6.17 Ezequiel 20.34

h 6.18 2

2 CORINTIOS 7  566

naa munu bain anbutiꞌ taanguikeñuu kindetyuyu. 3 Ne ñullanu entsanditu, tsa deeve tiꞌ veraꞌ tyawaanundindyuyu; tsajuꞌ iya kaspele ñullanu naatiꞌ ñullaya lalaꞌ pensasha dechuve tiꞌ, lala ñuiba buluren dechuꞌ, ñuiba buluren peyanuu junmalaya, buluren peyakeenu juve tiꞌ pandundiyu. 4 Iyaa ñulla tiba uwain tsanguenu detsuve tenna juꞌ, ñullaꞌ mityaren mika daj tenna jujuuyu. Naa tituba taaju depullan chuꞌ bain, tiba kiikes jintsunu tenna juꞌ mika sunden juyu. 5 Macedoniasha vijimiren lekabanguiꞌmujchin tsanamu deeyu, veelaba ti peletuba kataataakendu, tsenmin lalaꞌ pensasha tyeeba inu juve tenna juꞌ jelaa jujuundu. 6 Tsenñuren sundyajtuu jumulanu bain daj pensa mangumu Diosya Titonu lalaꞌ junga ereꞌ sunden pensa mangukaave, 7 tsenmin ne ya tsaiꞌ jañaa masundyaindyuyu; tsa jutyuꞌ, ya bain ñullaꞌ mityaren mika sundenna juñuꞌ mityaa masundyayu, tsenmin ñulla uwain inu mangatanu tyaꞌ ajchundyandetsuve tiꞌ, tyee iꞌ puiñuba juntsaꞌ mityaren llakindyandetsuꞌ, in mityan mika pensaa dejuñu bain tsandiꞌ wainñaa kayu masundyayu. 8 Naa ñullanu kaspele piikeꞌ eeñu kiika yuj llakindyakaamuwaañuba, nenñaa tsanguikeeñanga tyaꞌ, challa juntsan mitya llakindyanu jutyuyu. Tsajuꞌ naa kaspele juntsa kiika eeñu, ñulla jayuꞌ mitya llakindyaꞌ depuiñu, i bain llakinguemu juꞌ bain, 9 challaya yuj sundenve. Tsaaren ne ñulla juntsa-iꞌ dellakindyañaa iya masundyaindyuyu, ñulla juntsa-iꞌ dellakindyaꞌ vetaꞌ pensa demanñuꞌ mityaa sundenga juyu. Tsejtu ñulla juntsa-iꞌ dellakindyaꞌ bain Dios tsanguikaañaa tsa deive. Tsaꞌ mitya lalaya ñullanu tichiba firuꞌ kindetyuyu, 10 matyu Dios tsanguikaañaa ñulla dellakinguishu juntsaa, ñullanu uwain vetaꞌ pensa mangareꞌ livee iinuuya tirekaamuve, tsenmala juntsan mityaya ne llakindyainuba jutyuve. Tsaaren entsa tusha tiba taaju iꞌ puinu jumulaꞌ mityaa, tsenmin Diosnu keeminchaa jutaa llakinguentsushu juntsaa, peyaꞌ piyainuuya tiyakaanu tsuve. 11 Ñullanu Diosya tsangueꞌ llakinguikareꞌ puikaañu ¡challa tyee iꞌ pullaꞌba pensangueꞌ keekidei! Entsaitaa ñulla puluꞌ pensa dekeꞌ, inu debalelainaꞌ bain, firuꞌ dekiñu daran de-ajaatyainaꞌ bain, tyee ichunga tyaꞌ dejeetyainaꞌ bain, inu mangatanu ajchundyanaꞌ bain, mika pensaa dejunaꞌ bain, tsenmin in mityan mika deveraꞌ tyaꞌ juntsa kuipa chachinu taaju de-iwareꞌ puiteve. Ñulla entsangue dekeꞌ puitaa, ti kuipaba jutyuꞌba entsangue dekeewaave. 12 Tsaꞌ mityaa ñullanu juntsa kiika piiketu ne firuꞌ kemunu kentsureꞌ panu tenñu piikindyuyu, tsenmin kentsuramunu balelanu tenñu piikindyuyu, tsangueꞌ piikemiya ñulla lalaꞌ mitya tyee kenu ajchuu dejuꞌba Diosaꞌ ajuusha juntsai dekatawasa tenñaa tsangueꞌ piikiyu. 13 Kumuinchi entsaiꞌ pullaꞌ lalanu sunden pensa mandireve. Tsaaren naa entsaiñu sunden pensa mandiyaꞌba, Tito bain yuj sunden juñu dekataꞌ mityaa, kayu sunden pensa dejuyu, ñulla yanu kayu ajkesha tsangues jintsunu sunden pensa demanguñuꞌ mitya. 14 Iya kaspele Titonu paꞌ ñullaꞌ mitya dajtyaa juyu tiꞌ  

 

 

 

 

 

 

 

 

 

 

 

 567

2 CORINTIOS 7​, ​8

pañu bain, ne ñulla tsa dejutyuꞌ inu firuꞌ katakarendetyuve. Tsejtu lala ñullanu tyee depañuba anbuda jutyuꞌ uwain tsajuꞌ, lala Titonu naadetiꞌ ñullaꞌ mitya dajtyaa juyu tiꞌ depañuba uwain juntsaa de-iꞌ puive. 15 Tsenñu challa yaa ñullanu mika estyaa pensa juve, ñulla demeengueꞌ yanu mika debalengureꞌ uraꞌ demikañu mandenga mandengakitu. 16 ¡Ñulla naa-indu bain juntsaaren jintsunu dejuve tenna jutu mika sundenve!  

 

8

1   Estennu

Jerusalénꞌ chullachi ufeenda

keranguemu naatalala, Macedonia pruvinsiasha kerangueꞌ vee vee mujtu waku wakudimulanu Dios naake uraꞌ keꞌ keewaantsuñuba umaa wainnu tenve. 2 Yalaya naa tituba de-iꞌ pullandu bain, yuj sunden dejuve, tsenmin naa yala pure dejuꞌ bain, tarukaaba kuwan tsa tsa dekeꞌ, ufeenda lushi kuwaꞌ esa putyu sunden kuwa kuwadekive. 3 Iren uwain yala naa naake kunu detyaꞌ tsa tsangue kumu deeñu bain entsana keenamuyu, tsejtu naa yala pureꞌ kuwakenuu dejutyuve tenñu bain, kayu juntsanu pullake kumuwa deeve. 4 Tsejtu yai tenen tsanguendyatu, Cristonu keranguemulachi yalanu bain kuveꞌkaaka tiꞌ patintsumu deeve. 5 Tsenmin yalaya lalaꞌ pensaya tsanguiꞌchu deeve tenna juuba kayu dekidekiwa, tsaaren ajkeꞌ kilaya yalaren naa Bale Rukunu bain, naa lalanu bain ne ufeendaaba juꞌ kuwan tsa deiwa, Dios naadeisa tyañuba juntsa deitu. 6 Tsenñuꞌ mityaa Titonu entsa tsamantsa aa uraꞌ dekiñu, ya kaspelen ñullaꞌ kejtsapala teꞌkandun dyamuñu, tsa mande tiꞌ uꞌta detiyu. 7 Ñullaya naa tichi bain uraꞌ katawamu deeve, naa uwain tsaave tyaꞌ Diosnu keenguenchi bain, naa panchi bain, naa aseetanguenchi bain, naa tiba jeke kiikeꞌ kuwanchi bain, naa lala ñullanu estyamu deeñu bain, i tsangue keewaamu dejuꞌ, uraꞌ katawamu deeve; tsaꞌ mitya naa lushi kuwanchi bain tsaren junuuya kidei. 8 Ñullanu ne entsanditu tsanguenbera kenu dejuve titundindyuyu, entsandimiya veelaa kuwandyaꞌ tyee kenu tyaꞌ ajchundyandetsuñuba ñui bain demijasa tenñaa tsandintsuyu, tsenmalaa ñulla uwain naa-i estyamu dejuꞌba tsangue keewaanu dejusa tenñu. 9 Ñulla mideeve lalaꞌ Bale Ruku Jesucristo mika ura ruku jutu, naa taruku juꞌ bain, ñullaꞌ mityaren tsaa pure tiyaimuwaañuba, tsenmala ya juntsaiꞌ pure tiyaiñaa ñulla taruku tiyanudetsu. 10 Entsaatala jayu ñullanu aseetanguikareꞌ uleꞌ panu tenve; ñulla kaspee añuchi uwain tsanguenu tyaꞌ, entsaa dekeꞌ peepumuwa deeve. 11 Tsaꞌ mitya ñulla juntsa dekeꞌ dyadei, tsejtaa ñullaren nunbi jingue kenuu juꞌba tsanguenu ajchundyaꞌ keñu jumu dekeꞌ dyanu. 12 Main titi detanañuba juntsaya jayu nejuuve, ura balemiya tyee kuwakenuu juꞌ kuwandyaꞌ kuñuba juntsaa kayu baleve. 13 Entsanditu ne ñulla veelanu uraa kenu  

 

 

 

 

 

 

 

 

 

 

 

i 8.7 lala ñullanu estyamu deeñu bain tityumujchi, mantsa yumaa kiikalanuya entsa pillave: lalanu estyanchi bain.

2 CORINTIOS 8​, ​9  568

tyaꞌ tsa dekimee, ñullaa tiba tajtu lastemaa detiyasa tenñundindyuyu, tsa jutyuꞌ, pareju uraꞌ dechusa tenñaa tsandintsuyu. 14 Challaya ñullaa yala tajtunu jumu detanave, tsaaren bene ñulla tajtunu jumaa yai bain tananu detsuve, tsenmin tiba pureꞌ taa jumula bain mika meneste juu chumulanu kuwanuuya dejuve, tsenmalaa paree jujuunu detsuve, 15 juntsainmalaa matyu Diosaꞌ Kiikanu fintsumi manánu laapuꞌ patu naatiñuba juntsaa junutsu: Naa aa kamuchi bain laraiba indyu, naa jayun kakemuchi bain deiiba indyuve, j tiꞌ pillave.  

 

Tito Corintosha erami.

16 Iya

ñullaꞌ mitya tyee kiikenu pensañuba naa Titonu bain juntsanguenu pensaren kekaañuꞌ mitya, Diosnu yuj urave tintsuyu. 17 Tsenñu yaa iya naakesa tyaꞌ pañuba tsanguenu tiyave, tsenmin ya maaliren tsanguiveꞌnu pensaꞌ mitya, challa ñullaꞌ junga keejanu juve. 18 Tsenmin main keranguemu naatalanu bain Titoba bulu eentsuyu. Yanaa nuka keranguen chumula bain laapuꞌ patu uraa tene pamu deeve, Diosaꞌ mika ura kuindaꞌ mityan ti bain mika uraa kes neneiñu. 19 Tsenmin kerangueꞌ vee vee mujtu waku wakudimu chachillaren yanu demiꞌkeꞌ kaꞌ, laaba bulu neveꞌnu detireve veelanu kuwanu erentsumi lushi kavetes nenutsu, juntsangueꞌ Bale Rukunaa balengureꞌ keewareꞌ, naa yalanu bain lala uwain tsanguiveꞌnu tyandaa tsanguendetsuñuba mijakaanu, 20 tsenmalaa kuwanutsumi lushi pureꞌ sera dekiñuba lalanu naꞌbaasa paiꞌnudetsu. 21 Tsajuꞌ lalaya Bale Rukuꞌ ajuushan deechuꞌ kiiketyumujchi, naa ne chachillaꞌ ajuusha bain tsaren deechuꞌ katawainuuya kiikendetsuyu. 22 Tsenmin kamain keranguemu naatalanu bain yaiba bulu erendetsuyu; yaa tiba uwain naake kiveꞌnu pensa juꞌba titala bain tsangue keewaamu juve, tsejtu umaa ñulla naakenu paꞌba uwain tsanguenu dejuve tenna juꞌ mityaa, kayu ajchundenna jantsuve. 23 Tsenmala Titonu laapuꞌ panmalaya, Titoya ñuichi uraa kenu iba bulu taawasha kemu juve, tsenmala vejan keranguemu naatala pallu jumulaya engu kerangueꞌ waku wakudimulaꞌ era chachi dejuꞌ, yai bain Cristonu balenguremula deeve. 24 Tsaꞌ mitya vejan kerangueꞌ vee vee mujtu waꞌdimu chachilla mijanudetsu, uwain jamulanu estyaꞌ keewaadei, tsenmalaa lala ñullaꞌ mitya naati uraꞌ paꞌ dajpamu deeñuba uwain juntsaa junutsu.  

 

 

 

 

 

 

 

9

1   Keranguemu

Keranguemulanu kuwanu lushi kaya

naatalalanu kuwanu lushi waꞌkaanu jumunu laapuꞌ panmalaya, ñullanu mamijakareꞌ piiketintsunuba jukeetyuve, 2 matyu ñulla uwain tsanguenu ajchu deeñu bain iyaa miꞌ mitya. Tsejtaa naa-uwanu Macedonia pruvinsiasha chumulanu patiꞌ bain ñullaꞌ mitya daj  

j 8.15 Éxodo 16.18

 569

2 CORINTIOS 9

papatiyu, ñulla Acaya pruvinsiasha chumulaya kaspee añuchiren kuwanun jutyu denave tiitiyu. Tsenñu pureꞌ chachilla Macedoniasha chullaya ñulla tsa deeve tiñu demijataa, yai bain tsanguenu ajchundyandetsuve. 3 Tsejturen entsa naatalalanu eentsumiya, ñullanu uraꞌ kureꞌ pañu palaa anbuda juu katawaiꞌsa tenñaa erentsuyu, tsenmalaa ñulla tyee kenuu dejuꞌba yaibaa tsangueꞌ keenanudetsu. 4 Tsandenna mantsa Macedoniasha chumula iba dejaꞌba imiya, naa ñulla uwain kuwanu dekeenatyuñuba dekatanmalaya, lala pureꞌ yujpeyainu dejuyu, ñullaꞌ mitya pureꞌ uraꞌ patindetsuren tsaa dekatawatyushu juntsaa. Tsenmin juntsaaba inmalaya ne ñullaa yujpenu dejutyuve tindyuyu, ñullaa kayu yujpenu detsuve. 5 Tsejtaa juntsangueñu uraa tenñu, entsa naatalalanu ñullaꞌ junga ajkeꞌ erentsuyu, tsenmalaa ñulla tyee kuwanu pamuwa deeñuba yai bain dekamishtiꞌ waꞌkaaveꞌnudetsu. Tsangueꞌ waꞌkareꞌ dekeenashu juntsaa, juntsa lushi waꞌkara uusundenna dekuve tyakaanu dejuve; tsa dekityushu juntsaa, kuwandyaiꞌmujchin tsanguendetsuve tyakaanuuya dejuve. 6 Entsandinu palaanu tengaya judei: Mun jayun wajkikemu juꞌba, jayun puka iwaakenu tsuve, tsenmala mun pureꞌ wajkikemu juꞌba, pureꞌ puka iwaakenu tsuve. 7 Mu bain naa naake kuwañaa urave tyaꞌba tsa tsangue kuwanuu juve, ne kuwandyaiꞌmujchin kuwanuya kityudei, tsa jutyuꞌba, kuwadei tiꞌ uuden dekiñaa kuwanu tiyatyudei; matyu Diosya uwain kuwandyaꞌ sunden kumulanuya estyamuve. 8 Tsejtu Diosya tsanguenuu juꞌ, ñullanu uraa ikaatu tiba tsamantsangue kuwa kuwakenu tsuve, tsenmalaa ñulla tiba meneste imulaya yamuj juu tanaiꞌnudetsu, tsenmin tiba laraa detanaꞌ, veela meneste juu chumulanuya kuwan chuꞌ uraa kiikenudetsu. 9 Diosaꞌ Kiikanu tichiba aa ura chachinu laapuꞌ patu entsandive: Yaa meneste juu chumu chachillanu tiba pureꞌ velen chumu juve, tsenmin yaꞌ tiba uraa keñu jumulaya naa-uwanuba tengayaa chukaamu juve, k tiꞌ pillave. 10 Ñullanu naa wajkentsumi kiya bain kuwamu, naa tiba finutsumi bain kuwamu Diosya, ñulla titi wajnu meneste deeñu bain dekuwanu tsuve, tsangueꞌ awakaanu tsuve, tsejtu ñulla veelanu kuwamu dejuꞌ yuj ura deenmalaya, tsamantsangue puka iwareꞌ mangakaakaakenu tsuve. 11 Juntsainmala ñulla tiba pureꞌ taa detiyaꞌ, naa-uwanuba uwain kuwandyaꞌ sunden kuwa kuwakenu detsuve. Tsenmala ñullaꞌ kuwanutsumi dewaꞌkareꞌ laaba de-eenmalaya, juntsan mityan keranguemu naatalala Diosnu yuj urave tiꞌ papatinu detsuve. 12 Tsejtu lala tsangueꞌ keranguemu naatalalanu kuwanutsumi taꞌtu, ne yala tyee tajtu deeñuba juntsalaren tandiyakaanuu kindetyuꞌ, naa Diosnu bain yuj urave tikaanuu bain kendetsuyu ñuiba. 13 Tsenmala ñulla entsangueꞌ tyeeba dekuwatu, uwain Cristoꞌ mika ura kuinda naatiñu ñulla mijamu dejuꞌba  

 

 

 

 

 

 

 

 

 

 

k 9.9 Salmo 112.9

2 CORINTIOS 9​, ​10  570

juntsangue meenguendetsuñu keewaranu juve, naa ñulla uwain tsanguendyaꞌ mika sunden dekuwaꞌ, naa yalanu bain, naa kayu vejanlanu bain entsangueꞌ kuwanu de-eeñuꞌ mitya, yala Diosnu mika balengureꞌ panu detsuve. 14 Tsenmin yala ñullaꞌ mitya Diosba kuinda keꞌ, ñullanu naa-i estyamu dejuꞌba tsandi papatinu detsuve, ñullanu Dios naake kikareꞌ ya tsamantsa aa ura juꞌba yalanu tsangue keewaañuꞌ mitya. 15 Diosnu mika urave tindetsuyu, Dios lalanu tsamantsaa kuwañu sundenganchin naati pan tsaa jukeeñuꞌ mitya.  

 

10

1   Iya

Pablo ya tyee kiikes nene-iꞌba balelaꞌ pakami.

Pablo, Cristo naa-i tenbityamuñu bain, tsenmin naaju aa ura rukuñu bain juntsandenna juꞌ pantsuyu, naa ñullaya iya ñullaꞌ junga pumiya ne dejeetyaañuu rukuren, vee mujtu pumiya daj rukuuñungue keewaamuve tiidetiñuba. 2 Tsaꞌ mitya iya ñullaꞌ junga maatu, inu naꞌbaasa depaꞌ, ne chachilla tyee ken chumu deeñuba juntsaaya iya kemuve timulanu naatinuu juñuba, tsandi pakaꞌ panu kikaatyukai tinu tenve, tsaaren tsanguenuu faanmalaya, yaiba kajuꞌtaladiꞌ panu tsuyu. 3 Uwain lala mu bain chachi deeyu, tsaaren lalaya entsa tusha chumu ne chachilla naake vinguemu deeñuba tsangue vinguityu deeyu. 4 Lalaya entsa tusha chumula vinguendu tyee menestenguemu deeñuba juntsaa menestenguityu deeyu. Tsa dejuꞌ, naa tsamantsa deraꞌ veeta juuñuu jumunu bain Dios tsanguikaañaa vingueꞌ senaa-eekiñunguemu deeyu. Tsenmin lalaya naa yala tituba depaꞌ 5 Diosnu keenguikaan jutyuu dekiñu bain, bengaꞌ tyuliꞌ jimu deeyu, tsangueꞌ kumuinchi chachillaꞌ pensa jumula Cristochi tene uuden juu tiremu deeyu, tsenmalaa yanu tene dekeengueꞌ, ti dekenu tireñuba tsangues jijiimu tiyanudetsu. 6 Tsenmin umaa ñulla Cristoꞌ palaanu uraꞌ aseeta dekeꞌ tsa tsangues jindetsuren, mantsalaya yaꞌ palaanu meenguityuu detiyanmalaya, taaju iwareꞌ puitekaanu jujuunu detsuyu. 7 ¡Naa-i katawantsuñuba tsangue aseetangueꞌ keedei! l Mun uwain yaꞌ pensasharen Cristochiyu tyamuya, naa lalanu bain tsaren Cristochi deeve tyade. 8 Naamika iya bale ruku juꞌ tsandinuu juꞌ yapa paꞌ bain, yujtyanuu jutyuyu, matyu Bale Rukaa inu tsandinuu tireꞌ ñullanu uraꞌ tirekareꞌ jiinuuya ketu, firuꞌ tirekaakenuuya kendyuñuꞌ mitya. 9 Tsejtu naa entsangueꞌ kiika piikeꞌ ereꞌ bain, ne ñullanu wapandekiñunguenu tendyuve. 10 Mantsala entsandimu deeve: Naamika kiikanuya tsamantsa jeetyawaanuꞌ paꞌ bain, ya jaiñu keeñaa munuba wapandenuꞌ jutyuren ne tsaave, naa panchi bain meenbashiinundi patyuren tsandimuve, timu deeve. 11 Tsaaren mun tsandimu juꞌba minu juve, naa lala vee mujtu putu, ñullanu naati pamu dejuꞌ bain, tsenmin naake kiika piikemu dejuꞌ bain, naa ñuiba manbuꞌ bain tsaren junu deeñuba.  

 

 

 

 

 

 

 

 

 

l 10.7 ¡Naa-i katawantsuñuba tsangue aseetangueꞌ keedei! tityumujchi, Ñullaya chachilla ne keranchi naa-i katawamu deeñuba juntsaatalaa tejan keemu deeve tiꞌ aseetanguikara bain junu juve.

 571

2 CORINTIOS 10​, ​11

12 Tsejturen

lalaya veela yai tenen maali naati dajpamu deeñuba juntsalaba buuteꞌ keraiñuu inu dejutyuyu. Tsejtu yai tenen naajuꞌ bain maali tsaayu pensajuꞌ veelaba miꞌteꞌ keekutinu ajchuu chachi deetu, ti kenduba aseeta jutyu chachi deeve. 13 Lalaya naa-i dajtyanuu juñuba kayu juntsanu pullai dajtyanu dejutyuyu. Lalanuya Diosya nunbi jingue tiba kiikenuu juñuba junbin jiinungue tiremuve. Tsajuꞌ Diosya lalanu lalaꞌ taawasha kenu tena ñullaꞌ chunu Corinto pebulusha eeve. 14 Tsaꞌ mitya lalaa ne ñullanu tsandin jutyuu dejuꞌ tsandindetyuyu, ne ñullaꞌ junga ajkeꞌ jatyuren tsandindetyuyu. Matyu lalaa ñullaꞌ junga Corinto pebulusha ajkeꞌ jaꞌ Cristoꞌ mika ura kuinda mijakaamuwa deeyu. 15 Tsajuꞌ ne veelaa yumaa tsangueꞌ taawasha kemuwa deeñuren, lalaa kikeñungueꞌ dajkeewarendetyuyu. Tsa jutyuꞌ, laachi nunbi jingue kiikenuu tirañuba tsantsa jingue kiikendu, kayu ñullaꞌ kejtsapalaa taawasha aa kiikes jintsunu pensa deeyu, ñulla Diosnu kayu uraꞌ keengues jindetsunmalaya. 16 Tsenmin naa veela ñullaꞌ keetala chumulanu bain Diosaꞌ mika ura kuinda mijakares nenu pensa deeyu, tsejturen yumaa veela mijakares nendalaya tsangues nenu pensa dejutyuyu, tsejtaa veelaa tsa dekiñuren, laa bain jundalan keꞌ, lalaren tsa dekiyu tenna juꞌ dajtyan jutyu. 17 Tsajuꞌ, Diosaꞌ Kiikanu naatinga: Mun ne dajtyainu tyaꞌ bain, Bale Ruku tyee keñuba juntsaꞌ mityaa dajtyasa, m tive. 18 Matyu mun maaliren uraꞌ juyu tiꞌ daj katawanu tyamuya balenguraiꞌnu tsuve, tsaaren munaa Bale Rukuren uwain uraꞌ juve tiñuba, juntsa chachiya balenguranu tsuve.  

 

 

 

 

 

11

Pablo, Jesúsꞌ mitya kuinda kenu laraꞌ erayu tyamulaba

1   ¡Naa

iya yuj iiñuu pan tsandiñu bain, tsantsaya meedikai! Uwain tsantsaya meedikai. 2 Iya ñullaꞌ mitya pensaa juꞌ, tiba iꞌchudeenga tenna jutu ne maali tsandenñu jutyuꞌ, Dios tsandyakaañaa tsandenna juyu. Tsejtu iya ñullanu ma unbee rukuchee, matyu Cristochee yaꞌ shinbu juuñuu tirenu ken tsanguiyu, tsejtu naaju unbeelanuba tsaityu ma panna juñu tajiꞌ yanu kuwan tsanguenu tirenu tenna juyu. 3 Tsaaren ñullaꞌ mitya pureꞌ pensaa juyu, matyu kaspele Evanu piñi naake bibuꞌ ketaa anbuda keranguikaamu juꞌba, naa ñullanu bain tsaren keꞌ anbuda keranguikaanmalaya, ñulla Cristonu tsamantsa sundyaꞌ tiba anbuda putyu yachin juu jindu bain, juntsa pensa demanbirekenuu dejuve. 4 Ne mulaa ñullanu kuinda dekijatu, lala Jesúsnu laapuꞌ patu, naake mijakaamu deeñuba juntsa detityuñu bain, tsa jutyuꞌba, ajkeꞌ kanu Espíritu jutyuꞌ, vee espiritu juu demangaꞌ bain, tsa jutyuꞌba, lalaꞌ mijakaanu Diosaꞌ mika ura kuinda jutyuꞌ, vee kuindaa juñu ñulla demeengueꞌ bain, juntsaya nejuuve tyaꞌ tsanguemu deeve. 5 Matyu iya, Jesúsꞌ mitya kuinda kenu laraꞌ eramu jutyularen tsamantsaayu tyamulaba pensangueꞌ keeñu, ne i bain yaichi faataa juyu tendyuve. 6 Naa iya panchiya  

 

 

 

 

m 10.17 Jeremías 9.24

2 CORINTIOS 11  572

uraꞌ shili patyu juꞌ bain, minchiya miyu, tsejtu uwain tsaa keewaamiya iya naa-uwanu ti kikeꞌ bain tsa tsanguitaa uwain miꞌba tsaa keewaamuyu. 7 ¿Tsejtu iya ñullanu Diosaꞌ mika ura kuinda mijakaaturen juntsan mitya lushi katyutaa tsangueꞌ ujcha laiñuu ketunguiwa, tsenmin iya balejtu kuraiñuu iꞌ, ñullanaa aawa kuraañuu tiretaa tsangueꞌ firuꞌ kikeñuu ketunguiwa? 8 Uwain kerangueꞌ vee vee mujtu waku wakudimula inu lushi kunu detiñu katu yalanu chipakiñunguiyu, tsejtaa ñuichi uraa kiveꞌnu. 9 Tsenmin naa iya ñuiba bulu putu tyeeba meneste jujuꞌ bain, ne ñullanaa tyeeba pakeꞌ bulla paindyuwaayu, matyu Macedoniasha jamu keranguemu naatalalaa iya ti menestendyañuba kumuwa deeve. Tsejtu ñuichi washkekutiꞌ bulla tyakaapunu jutyuwaayu; tsajuꞌ naa chai bain tsaren kes jintsunu tsuyu. 10 Cristoꞌ ajuusharen anbutiꞌmujchi entsandiꞌ naa ñullaꞌ junga Acaya tusha bain muba iya tyee kes nentsuꞌ sunden juñuba tsanguikaren jutyuu tirenu dejutyuve tenna juyu. 11 ¿Nenñaa entsajuꞌ ñullaꞌ lushi katyu jutuuwa? ¿Ne ñullanu estendyuñaa tsaatuuwa? Diosya mive naa iya ñullanu estyamuñu bain. 12 Tsaaren iyaa tyee kiikemu juꞌba tsangueꞌ jintsunu tsuyu, tsenmalaa veela iya naa-i balenguraa juñuba, yai bain tsandyanu tyaꞌba, juntsaa tiyan jutyu, 13 matyu yalaa Jesúsꞌ mitya kuinda kenu laraꞌ eramu jutyularen, juntsala deeyu tya tyaimu deeve, tsenmin anbukuindanuren keenguikaamu dejuꞌ, Cristoꞌ mitya kuinda kes nenu laraꞌ eramu jutyularen juntsaañungueꞌ neneimula deeve. 14 Tsenmin naa entsa deiñu bain, nejtaa tsaitu de-inga tyaꞌ ne wapanbashiinu kityudei, matyu Satanásren Dioschi piꞌkelaa jumu ma anjee juuñuu kataamu juve. 15 Tsaꞌ mityaa naa Satanáschi taawasha kemula bain uraꞌ kemu chachilla juuñuu dekatawañu bain, keenbashiinu kityudei. ¡Tsaaren yala tyee kiikenduba tsa tsai de-iꞌ pinu detsuve!  

 

 

 

 

 

 

 

 

16 Manen

Pablo tiꞌ mityaa dajtyanu juꞌba

tsandinu tenve: mu bain inu yujka juve tyatyudei; tsaaren uwain iya yujkave pensa deeshu juntsaa, iya yujka jutu naati panuu juñuba tsandi pakutikai, tsenmalaa iya jayu dajtyaꞌ katawanutsu. 17 Tsejtu iya entsandi dajpaꞌ bain Bale Ruku tsandikaañaa tsandityuꞌ, yujka juuñuu pan tsanditaa tsandinu tsuyu. 18 ¡Pureꞌ chachilla yalaꞌ tiba kiikeñu jumulaꞌ mitya mika dajpamu deeñuꞌ mitya, i bain tsaren dajpanu tsuyu! 19 Ñulla ti kendu bain aseetajuꞌ kiikemu chachilla deeyu tyamularen, yujka juuñuu chachillanun mika sundenna meenguemu deeve. 20 Tsajuꞌ veelachi uuden iꞌ taawasha ken chumu deeve, anbutikayaꞌ tiba yapa dekayan chumu deeve, aawandyamu dejuꞌ tituba dekiñu bain tsaikutin chumu deeve, tsenmin naa kajuutala bain pinballan chumu deeve. 21 Tsajuꞌ i bain yala ñullanu naaken chumu deeñuba juntsanguen chuñuya, ñulla inu balengureꞌbanguichu deeve, tsaaren inchiya juntsanguenu uu yujtyanuꞌ junu juve. Tsaaren veelaa tsangueꞌ dajtyandetsunmalaya, i bain dajtyanu tsuyu, naa iya yujka juuñuu ken tsanguitaa tsainuu juñu bain. 22 ¿Yala hebreo  

 

 

 

 

 

 573

2 CORINTIOS 11​, ​12

chachi dejuꞌ, juntsa palaachi pamu dejun? I bain tsaren hebreo chachi juꞌ, juntsa palaachi pamuyu. ¿Yala Israel chachi dejun? I bain Israel milla tsaa keenguemu juyu. ¿Yala Abrahamnu seraꞌ jamu chachi dejun? I bain Abrahamnu seraꞌ jamu juyu. 23 ¿Yala Cristochi taawasha kemu chachi dejun? Iyaa kayu tsaanchi yalanuba pullayu. (Entsanditu yujka juꞌ pan tsanditaa tsandintsuyu.) Iyaa kayu yalanuba pullake aa taawasha kemuyu, iyaa kayu yalanuba pullai peesu vimuyu, iyaa kayu yalanuba pullai bandamuyu, tsenmin iyaa naa tutanu kale kaleinchi bain kayu yalanuba pullai aa tsaimuyu. 24 Inu judío chachilla man bijee aste dekitu, 39 villa dekive tsa tsanguemu deetu. 25 Pen bijeeya inu chaꞌlichi debanviive, ma bijeeya inu shupukachi tene detyaꞌkive, tsenmin pen bijeeya in jinu baaku bain baivive, tsenñu ma bijeeya chukangumaa ma malu, ma kepe tsaa fera pi kejtala tsanamuwaayu. 26 Nukaba pureꞌ neimuyu, naa pijulatala pullandu bain tituba taaju depullanaꞌ bain, naa taamulaꞌ kejtsapala bain taaju iꞌ pullainaꞌ bain, naa judío ne chachillachi bain taaju iꞌ pullainaꞌ bain, naa judío chachi jutyulachi bain taaju deiꞌ pullainaꞌ bain tsaimuyu. Tsenmin naa pebulutala bain tituba taaju pullainaꞌ bain, jeenbaatala bain taaju pullainaꞌ bain, naa lamaatala bain taaju pullainaꞌ bain, naa keranguemu naatalala jutyularen tsaañungue keewaamulachi bain taaju pullainaꞌ bain, 27 naa pureꞌ taawasha ken chuꞌ tyubainaꞌ bain, pureꞌ bijee kastyumujchi tsaa tsanaꞌ pullainaꞌ bain, naa panda mujkentsu bain tsaa pullainaꞌ bain, naa pi bain kujchajtu pullainaꞌ bain, tsenmin ishtenñu dejullu kendu bain tsaa pullainaꞌ bain, naa jali uraꞌ panajtuu bain depullainaꞌ bain tsaimuyu. 28 Tsenmin naa juntsai taaju ken chuꞌ bain, kerangueꞌ vee vee mujtu waku wakudimulaꞌ mityaya malumere mika pensanguen chumuyu. 29 ¿Mun deendyatyuu dejuñuba i bain tsandyaveꞌtyu juwa? Tsenmin ¿munu ujcha lawaadekiñuba tsangueꞌ ujcha lawaamunu ajaatyatyu juwa? 30 Tsajuꞌ iya tiꞌ mityaaba dajtyanuu jushu juntsaa, deendyatyun mityaa dajtyanu tsuyu. 31 Lalaꞌ Bale Ruku Jesucristoꞌ Apa Dios, naa-uwanuba mika urave tikayamu Diosya, uwain mive naa iya entsanditu anbutindyuñuba. 32 Uwain tsaave. Matyu iya Damasco pebulunu punu uwanu rei Aretaschi bale ruku pumu juntsa pebulu juukapanu suutadu washkaamuwaave inu peesu kanu tyatu, 33 tsenñuren mantsa chachilla inu ma pishkalinu pudekeꞌ, juntsa pebulu veeta kaiꞌtala chuwachi masku baisha manbajtekemuwa deeve. Tsenñaa yaichi kayatyuꞌ livee iꞌ miimuwaayu.  

 

 

 

 

 

 

 

 

 

 

12

Kipiiñu-iꞌ katara bain, bene tyee inuuñuba wandya bain

1   Mu

bain ne maali naajuꞌba tsandi dajkeewareꞌ patu tiba uraanuu ityu deeve. Tsaañu bain inu Bale Ruku keewaañu, iya kipiiñu-iꞌ tiba katañu jumulaa depaꞌ daj keewaanuu juyu. 2 Cristonu keengueꞌ jimu ma rukunu iya kerayu, tsenñu juntsa ruku selu aa kaiꞌsha  

2 CORINTIOS 12  574

kayaꞌ jiñu yumaa 14 añu juve. Tsaaren naa juntsa unbere ya entsaa chachi juuren kayaꞌ jiñu bain, naa aaman juuya kayaꞌ jiñu bain juntsaa mijtuyu, Diosren miive. 3 Tsaaren paꞌbandyeeshu (naa juntsa unbere ya entsaa chachi juuren kayaꞌ jiñu bain, naa aaman juuya kayaꞌ jiñu bain juntsaa mijtu juꞌ, Diosren miiñuba, juntsaa miyu) 4 yaa tsaa selusha naranainsha takaive, tsejtu jungaa munuba wandyajtu palaa jumu, matyu naaju chachillanuba wanditinuu jutyu palaa meeve. 5 Tsaañu iyaa tsaa unbereꞌ mityaya dajtyanuu juꞌba, maaliya dajtyanuu jutyuyu. Tsajuꞌ inu dera putyundennu juutalaa laapuꞌ panu tsuyu. 6 Tsaaren naa iya maali daj paꞌba yuj iiñuu jutaa tsandin jutyuyu, iya anbutindyuꞌ uraꞌ pandaa tsandintsunu juꞌ mitya; tsaaren tsandin jutyuyu, tsenmalaa chachilla iya malumere tyee kiiken chumuñu bain, tsenmin iya tyee pan chumuñu bain juntsanu pullati kureꞌ pensanguiꞌnudetsu. 7 Tsenñu iya juntsaa kataꞌ kerajtunu keewaramu juꞌba tsamantsa dajtyaa tiyaiꞌnutsu, in bulunu ma pu lluidin tsaiñu mika taaju kentsuyu, matyu tyeeba Satanáschi eeñu jumaa inu jaꞌ taaju iwaantsuve. 8 Tsenñu iya Bale Rukunu juntsa taaju iwara mangade tiꞌ pen bijee payu. 9 Tsenñu Bale Ruku inu entsandive: Iya ñunu estyaꞌ keewara jumaa kayu baleve; ñu dera putyundyanmalaa iya naakenuuñuba kayu entsai katawamuve, tiwa. Tsaꞌ mitya inu dera putyundenguen mityaa kayu dajtyanu tsuyu, tsenmalaa Cristo tyee kemuñuba in mitya kayu entsai keewaranutsu. 10 Tsajuꞌ naa Cristoꞌ mityaa dera putyuuñuu juꞌ bain, defiruꞌ pañu bain, tiba meneste juu chuꞌ bain, naꞌbaasa kenu bendaa dekiñu bain, tsenmin naa naaken tsandenna chuꞌ bain sunden juyu. Tsajuꞌ naa-uwanaa inu dera putyuuñu tenñuba, juntsa uwanaa kayu dera juuñuu juꞌ tiba dekenuu juyu.  

 

 

 

 

 

 

 

11 Ma

Pablo Corintosha chumu keranguemulaꞌ mitya pensandyami.

yujka naati paꞌ dyanuu juñu bain iya juntsandiꞌ dyaiyu, tsaaren ñullaa inu tsandikaanuu dekive. Ñullaa inu laapuꞌ paꞌ uraꞌ patinuu dejunuren tsa detityuve, matyu juntsala Jesúsꞌ mitya kuinda kenu laraꞌ eramu deeyu tikayamula, tsamantsa deeyu tyamula naadejuꞌba inu pullaa dejutyuve, ura pañuya, naa iya tiba juñu jutyuꞌ bain. 12 Naa inu tituba firuꞌ kendetsuba jei kidandai paijtyuꞌ tsaikutindaa, naa Diosyaa tsanguekaantsuve tyainuu bain, keenbashiinuu keꞌ keewara bain, tsenmin tiba tsamantsaa keꞌ keewara bain ñullaꞌ ajuusha tsa tsangue dekeꞌ puiñu jumulaa naa iya ura uwain Jesúsꞌ mitya kuinda kenu laraꞌ eramu juñuba keewara deeve. 13 ¿Tiꞌ mityaa ñullanu vejan kerangueꞌ waku wakudimula juuñungue kiikityu juwa? Iya ñullanu tiba pakeꞌ bulla kityu juwaajuꞌ mityaa, ñullanu yaiba paree jungue kiikityuwaayu. Iya entsanditu ñullanu yujpewaanuti paꞌbandiñuya, entsaꞌ mitya inu kuipa faawaakenuu kityukai. 14 Ñullaꞌ junga entsaba pen bijee janu jutu maanun jutyunayu, tsejtu entsa bijeenu bain ne ñuichi washkekutinu jutyuꞌ bulla tyawaakenuu  

 

 

 575

2 CORINTIOS 12​, ​13

jutyu maanu tsuyu. Tsenmin ñulla tyee detañuba iya juntsaa miꞌkes nendyuyu, iyaa ñullanaa meneste nentsuyu; matyu apalaa yaꞌ kaillachi lushi miꞌkeꞌ waꞌkaanuu dejuve, ne yaꞌ kaillaa yaꞌ apalachi lushi miꞌkeꞌ waꞌkaanuu dejutyuve. 15 Tsenñuꞌ mitya iyaa ñullaꞌ mitya ti taꞌba millangaanu tsuyu, tsenmin iya ñullaꞌ mitya tyeeba inuu jushu juntsaa tsainu tsuyu. Tsejtu iya ñullanu kayu estyaꞌ keewarenmalaa, ¿ñulla inu kayu jayun estyainuu dejuyu? 16 Uwain iya ñuichi washaꞌ ne bulla tyakaapukemu jutyuñuba ñulla mideeve. Tsenñuren mantsa chachillaya iya entsangueꞌ bibuꞌ keꞌ anbuda keranguikaataa ñullanu taanguentsuve detive. 17 ¿Tsejtu iya aangu ñullaꞌ junga eeñu chachillanaa tsangueꞌ taanguikaakeñunguiwa? 18 Titonaa, ma keranguemu naatalaba ñullaꞌ junga majaꞌ keede tiyu. ¿Tsejtu Tito jataa ñuichi tiba depakeꞌ kan? ¿Lala pallu jumula main naakes neñuba kamain bain tsaren kes neꞌ juntsa pensaren dejutyuwa? 19 Ñullaya lala entsangueꞌ firuꞌ dekituren, tsanguindetyuyu tiꞌ uꞌtandindetsuve tyaꞌba intsulaa tenve, tsaaren tsa jutyuve. Tsa jutyuꞌ, lalaya Diosaꞌ ajuusha pan tsandindetsuꞌ, Cristoꞌ chachi jutu naatinuu juñuba tsandi pandetsuyu. Tsaaren estennu keranguemu naatalala, tiba entsaa iꞌ pullantsumiya kumuinchi chachillanu uraꞌ keenguemu tirenaa tsaive. 20 Tsaaren aangu ñullaꞌ junga jatu, ñullanu naaju katanu tenñuba tsaa dekatawatyuꞌba juchu deeve pensa juyu; naa ñui bain inu naaju dekatanu tyaꞌba tsaa katatyuꞌba junu dejuve. Ñuitala vinbaa dejunaꞌ bain, kishtyaa dejunaꞌ bain, ajaraa dejunaꞌ bain, esaa dejunaꞌ bain, naꞌbaasa kuinda mereꞌ mawandin chunaꞌ bain, ne jatsaꞌ kureꞌ paviyaken chunaꞌ bain, dajtyaa dejunaꞌ bain, tsenmin tituba firuꞌ kiiken chulaa tenve. 21 Tsajuꞌ entsa bijee ñullaꞌ junga majaꞌ bain, ñullaꞌ ajuusha Dios inu mayujtyawaañu warendiꞌbandinu juyu tenve, matyu pureꞌ ñulla kaspele ujcha landun chaikama tsaa jindetsuꞌ, naa vetaꞌ pensa bain manguendetyuꞌ, Dioschi firuꞌ kurainuu bain kendetsuꞌ, naa naꞌbaasa bain tsa tsa-in chundetsuñuꞌ mitya.  

 

 

 

 

 

 

13

1   Entsaba

Tsa jutyudei tiꞌ de-insha piikeñu palaa

pen bijee ñullaꞌ junga janu juyu. Diosaꞌ Kiikanu entsandiñuba tengaya judei: Naa tiba, ne pai chachi juu, tsa jutyuꞌba, pen chachi juuya tsanguentsu keenayu detinmalaa, ti kenu juꞌba tsanguenuu tiyanu juve. n 2 Iya kaspele juntsaba pai bijee ñullaꞌ junga jatu naatimu juꞌba, challa baasha puꞌ bain, juntsala kaspele ujcha lan chumulanu bain, naa kumuinchi veelanu bain tsaren mandinu tsuyu: Manen ñullaꞌ junga maamiya umaa munuba tenbipun jutyuꞌ taaju de-iwaanu tsuyu, 3 matyu ñullaya naa inu Cristo tsa tsandikaantsuñuba katanu tyandetsuñuꞌ mitya. Tsenmin Cristoya ñulla tsaa chachi deeñu mantseꞌkaamu juꞌ tibanguiꞌtu nejuu jutyuꞌ, ya naajuꞌba  

 

n 13.1 Deuteronomio 19.15

2 CORINTIOS 13  576

ñullanu juntsa keewaanu tsuve. 4 Uwain Cristo kuusanu tuꞌviꞌ peyaꞌba, balelaꞌ kikakenuu jutyuuñuive, tsejturen Diosren tsanguikaañuya challa machuve. Tsenñu ya naajuꞌ balelaꞌ kikanuu jutyuwaañuba laa bain tsaren dejuꞌ bain, lala yaba buunamiya Dios tsaikaañu chunu detsuyu, tsejtaa ñullaꞌ junga jaꞌ bain, tsanguenuu junmalaya Dios naaju tsamantsaa juñuba juntsa keewaanu. 5 Ñullaren naa uwain uraꞌ keengueꞌ jindu bain kereꞌ keedei, tsejtu ñui tene main main uwain uraꞌ keengueꞌ jinduba mijanu keꞌ keedei. ¿Ñullanu jaiba mijakeetyuu naa Jesucristo ñullanu chuñu bain? ¡Ñulla tsa detyaiꞌshu juntsaa naa uraꞌ keengueꞌ jinduba mijanu keꞌ keetu uwain uraꞌ jindyuꞌba mijataa tsaanu dejuve! 6 Tsaaren ñullaya lalanu uwain uraꞌ keengueꞌ jimu juuya dejuñuba juntsangue keenu dejuve tenna dejuyu. 7 Tsenmin lalaya ñullaꞌ mitya Diosba kuinda kiidekiyu, tsenmalaa ti urajtu juuba dekityusa tenñu. Tsangueꞌba ne lala uwain Jesúsꞌ mitya kuinda kenu laraꞌ eramu juꞌba keewaanaa tsanguindetyuyu, matyu ñulla uraꞌ kiiken dechusa tenñaa tsanguindetsuyu, naamika lala ñullaꞌ keranchiya tsa jutyuñu bain. 8 Tsajuꞌ lalaya tyeeba kikenuu detireshu juntsaa, tiba anbuda jutyu jumunuya naatiꞌ masmiꞌ patinuba dejutyuꞌ, anbuda jutyunu tsa tsangue kiveteꞌ jiinuuya dejuyu. 9 Tsaꞌ mitya naa-uwanu lala deraañuu jutyu dejuꞌba, sunden juju deeyu, tsenmalaa ñulla kayu deraañuu junudetsu. Tsa dejuꞌ, lalaya ñullaꞌ mitya Diosba kuinda kiikes jintsunu detsuyu, ñulla kayu uraꞌ kerangues jintsuꞌ kasa mandiyaiñuu is jintsunudetsu. 10 Iya kayu ñullaꞌ junga jaiꞌmujchin entsa kiika piikemiya, ñullaꞌ junga jatu tiba urajtu juuba dekataꞌ naꞌbaasa ken jutyu tenñaa tsanguiyu. Bale Rukuya inu tsanguenuu tiretu, firuꞌ dekeꞌ tituba kityumujchi, keranguemu chachillanu kayu uraꞌ keengues jiinuuya kekaanu tiretaa tsanguive. 11 Keranguemu naatalala, ñulla sunden dechuꞌ, naaketaa kayu uraꞌ kerangues jinuu dejuꞌba juntsaaya kes jidei, vetaꞌ vetaꞌ sunden pensa manguikares jijiidei, naa-uwanuba veelaba bulu sunden chuꞌ, tiba bulla jutyu uraꞌ chudei. Tsenmala estyamu Dios, tsenmin tiba bulla jutyu uraꞌ chuwaanu tiremu Dios ñuiba bulu chunu tsuve. 12 Ñui tene vetaꞌ vetaꞌ yuj sunden chusa tidei. Kumuinchi keranguemu naatalala ñullanu uraꞌ chusa tindetsuve. 13 Bale Ruku Jesucristo ñullanu mika uraꞌ keꞌ jintsusa, Dios ñullanu estyaꞌ jintsusa, tsenmala Espíritu Santoya ñuitala buutekareꞌ uraꞌ ikareꞌ jijiintsusa.